MUKHANG sinusundan ng indie actor na si Ronwaldo Martin ang kanyang kuya na si Coco Martin. May pelikula na si Ronwaldo na ipapalabas sa isang kilalang international film festival.
Unang nagbida si Coco sa indie film ni Brillante Mendoza na “Masahista” noong 2005 at agad itong nakapasok sa Locarno International Film Festival in Switzerland at na-panalunan nito ang Golden Leopard Award.
Ngayon ay si Ronwaldo naman ang may pang-international na pelikula at ipapalabas ito sa 73rd Venice International Film Festival. Ito ay may titulong “Pamilya Ordinaryo.”
Bagama’t hindi ito lalaban sa main competition ng VIFF, kasali ito sa 13th edition ng Venice Days (Giornate Degli Autori) section ng naturang festival.
Magsisimula ang VIFF sa Aug. 31 at magtatapos sa Sept. 10, 2016.
Ang pelikulang “Pamilya Ordinaryo” ay isa sa official entries ng 2016 Cinemalaya Independent Film Festival mula sa direksyon ni Eduardo Roy, Jr., na nakilala sa mga award-winning indie films niyang “Bahay Bata” (2011) at “Quick Change” (2013).
Ang ibang foreign films na kasabay ng “Pamilya Ordinaryo” sa Venice Days section ay: “The War Show” (Syria); “Heartstone” (Iceland-Denmark); “Hounds” (Australia); “Indivisible” (Italy); “Quit Staring at My Plate” (Croatia-Denmark); “Guilty Men” (Colombia); “Polina” (France); “Worldly Girl” (Italy); “Sami Blood” (Sweden), and “The Road to Mandalay” (Myanmar-Taiwan-China-France-Germany).
Ang “Pamilya Ordinaryo” ay tungkol sa dalawang teenage parents at ang pagnanakaw ang naging paraan nila para mabuhay.
Kasama pa ni Ronwaldo sa “Pa-milya Ordinaryo” ay sina Hasmine Killip, Maria Isabel Lopez, Sue Prado, Ruby Ruiz, Moira Lang, Karl Medina, Erlinda Villalobos, Domingo Cobarrubias, Paolo Rodriguez, John Bon Andrew Lentejas, John Vincent Servilla, Rian Magtaan, Myla Monido, Alora Sasam at Ruth Alferez. (Ruel J. Mendoza)