By Erwin Beleo
AGOO, La Union – Patay ang isang tricycle driver rito makaraang barilin siya ng mall security guard na nakaalitan niya, Lunes.
Ayon sa pulisya, nangyari ang pamamaslang sa parking lot ng isang supermart sa Brgy. San Nicolas Norte.
Diumano’y naaktuhan ng security guard na kinilalang si Frederick M. Cabral, ang biktimang si Aldren E. de Garcia na umiihi sa likod ng kotse ng kanyang amo na naka-park roon.
Sinita ni Cabral si Garcia na ikinagalit nito.
Pumulot umano ng bato ang bikitima at nagakmang pupukulin si Cabral.
Sa pagkakataong iyon binunot daw ni Cabral ang kanyang service firearm at nagpaputok ng warning shot.
Hindi natinag si Garcia na umakma pa umanong sumugod sa kanya. Dito na niya binaril ang suspek na tinamaan sa gawing tiyan.
Itinakbo ng mga kasama si Garcia sa ospital nguni’t binawian din ito ng buhay habang ginagamot.
Sumuko naman kaagad sa pulisya si Cabral nguni’t pinipilit niyang self-defense lamang ang ginawa niya.
