By Hans Amancio
Dalawang hinihinalang drug peddlers ang nadakip sa isinagawang buy-bust operation sa Sampaloc, Manila, kahapon.
Kinilala ng police ang mga suspek na sina Marvin Conception, 32, at Ma. Mariz Judalena, 27, kapuwa nakatira sa 1456 Metrica Maria Clara Simoun, Sampaloc, Manila.
Bago sila naaresto, nagkasa ng buy-bust operation ang mga tauhan ng Station Drug enforcement Unit ng Malate Police Station (PS-9) sa pamumuno ni Senior Inspector Gil John Lobaton dakong 4:30 a.m. kahapon para masakote ang dalawang suspek.
Na-recover sa dalawa ang anim na sachet ng shabu at dalawang piraso ng P500 na dinala sa Manila Police District Crime Laboratory Office para gawing ebidensiya.
Nakakulong ngayon sina Conception at Judalena sa PS-9 Custodial Facility at nakatakdang sampahan ng kaukulang kaso.
